Despois dos dous concertos da pasada fin de semana (o segundo, e polo que contaron o mellor dos dous, tiven que perdelo polo traballo) comeza esta semana o Festival Vibracional TPS. O Centro de Novas Tecnoloxías do Pico Sacro, que tamén está detras da orquestra O.M.E.Ga e das sesións vibracionais que se viñan celebrando ata o de agora na sala Nasa organiza un festival de música improvisada en Santiago. Durante un total de catro días, do xoves 4 ao domingo 7, haberá un total de seis concertos de diversos artistas internacionais e galegos. Entre os primeiros cabe destacar a Klaus Filip, Margarida García, Ferrán Fages e Alfredo Costa Monteiro; e entre os segundos a Pablo Rega e a mentada O.M.E.Ga que tocarán no peche do festival.

Aínda que vexo probable non poder acudir a todos os concertos aos que querería ir (se podo ir a algún), a programación ten propostas verdadeiramente interesantes. E ademais, é o primeiro (?!!) festival de improvisación que se celebra en Galicia.

Algo máis de información na axenda cultural do concello Compostelán.